Кулінарная спадчына Браслаўшчыны - праект, прысвечаны традыцыйным мясцовым стравам
Ужо трэці месяц рушыць праект "Кулінарная спадчына Браслаўшчыны", які запусцілі ДУК "Цэнтралізаваная клубная сістэма Браслаўскага раёну" сумесна з БРАСЛАВ.BY. Неўзабаве яго арганізатары плануюць апублікаваць першую рэдакцыю кнігі, прысвечанай традыцыйнай кухні, а пакуль у сеціве паступова выкладаюць відэазапісы некаторых рэцэптаў.
Ініцыятыва праекта сыходзіла ад супрацоўніцы клубнай сістэмы Вольгі Букіс, якая ў 2017 годзе падзялілася сваімі напрацоўкамі з нашым сайтам. Гэта некалькі дзясяткаў рэцэптаў, запісаныя падчас разнастайных фальклорных экспедыцый. Прыблізна год сышоў на тое, каб распрацаваць канцэпцыю праекта, знайсці вярсталніка будучай кнігі і пачаць актыўна дзейнічаць. Куратары праекта зладзілі некалькі экспедыцый па раёне, запісалі новыя рэцэпты і падрыхтавалі змест будучай кнігі, у якую ўвойдуць некалькі дзясяткаў страваў. Таксама ў сацсетцы Ютуб з'явіўся асобны канал, прысвечаны браслаўскім стравам, дзе ўжо апублікавана некалькі ролікаў.
Адным з інфармацыйных партнёраў праекта стала грамадская культурніцкая кампанія "Будзьма Беларусамі!"
