У браслаўскай гімназіі латышскім школьнікам расказалі пра Беларусь

У браслаўскай гімназіі надовечы адбылося цікавае мерапрыемства, якое праходзіла ў рамках трансгранічнага супрацоўніцтва. Увесну 2016 нашы гімназісты ездзілі ў госьці ў Рыгу, дзе іх пазнаёмілі з латышскай культурай і традыцыямі, а сёлета ў калядны час прыняў гасцей Браслаў.

Латышскім школьнікам расказалі пра дасягненні беларускай культуры, пазнаёмілі з творчасцю паэта Максіма Багдановіча, а таксама прэзентавалі браслаўскі край і нашыя традыцыі, паспявалі песні па-беларуску.

Пасля гэтага гасцям паказалі імправізаваныя вячоркі, пазагадвалі загадкі, зладзілі ім майстар-клас па народных танцах пад дуду, пачаставалі беларускай кухняй. А назаўтра школьнікаў чакалі экскурсіі па горадзе, і музей традыцыйнай культуры. Словам, такія нефармальныя сустрэчы напраўду ўмацоўваюць сувязі паміж рознымі краінамі.

Шмат фота ТУТ

Галляш Сялява.

Фота аўтара